Act 21 | NdeIBE | STEP | Sathi sesizehlukanise kubo ngobuhlungu sawela elwandle saqonda nta eKhosi. Ngosuku olulandelayo saya eRodi, sasuka khona saya ePhathara.

Acts 21

Ukuya EJerusalema

1 Sathi sesizehlukanise kubo ngobuhlungu sawela elwandle saqonda nta eKhosi. Ngosuku olulandelayo saya eRodi, sasuka khona saya ePhathara. 2 Safumana umkhumbi owawuchaphela eFenikhiya, sakhwela kuwo sawela. 3 Sayithi tshazi iKhuphro sedlula ngeningizimu kwayo, yithi labayana siwelela eSiriya. Sakhuphukela eThire lapho umkhumbi wethu wawuzakwethula khona umthwalo wawo. 4 Safumana abafundi khona sahlala labo izinsuku eziyisikhombisa. Baholwa nguMoya ukuthi bamncenge uPhawuli ukuthi angayi eJerusalema. 5 Kodwa isikhathi sethu sesifikile, sasuka saqhubeka ngohambo lwethu. Bonke abafundi lamakhosikazi abo kanye labantwana basiphelekezela basikhupha edolobheni, safika ogwini saguqa sakhuleka. 6 Sesivalelisene sakhwela emkhunjini, bona babuyela emakhaya.

7 Saqhubeka ngohambo lwethu sisuka eThire sayakhuphukela ePhetholemayi lapho sabingelela abazalwane sahlala labo usuku lonke. 8 Sasuka ngelanga elilandelayo sayafika eKhesariya sayahlala endlini kaFiliphu umvangeli, engomunye wabayisiKhombisa.

9 Wayelamadodakazi amane ayengendanga aye lesiphiwo sokuphrofetha.

10 Sesibekhonapho okwezinsuku ezimbalwa kwafika umphrofethi okwakuthiwa ngu-Agabhu evela eJudiya. 11 Weza kithi wathatha ibhanti likaPhawuli wazibopha izandla zakhe lezinyawo ngalo, wathi, “UMoya oNgcwele uthi, ‘Ngayonale indlela abaJuda baseJerusalema bazabopha umninibhanti leli bese bemnikela kwabeZizwe.’ ”

12 Sathi sikuzwa lokhu sonke labantu bakhonapho sancengana loPhawuli ukuthi angayi eJerusalema. 13 UPhawuli wasephendula wathi, “Likhalelani lingidabula inhliziyo yami na? Kangilungelanga ukubotshwa kuphela, kodwa lokufa eJerusalema ngifela ibizo leNkosi uJesu.” 14 Kwathi ngoba engancengeki sadela sathi, “Mayenzeke intando yeNkosi.”

15 Ngemva kwalokhu, salungisa sasesisiya eJerusalema. 16 Abafundi abathile abaseKhesariya basiphelekezela basisa emzini kaMnasoni lapho esasizahlala khona. Wayeyindoda edabuka eKhuphro engomunye wabafundi bakuqala.

Ukufika KukaPhawuli EJerusalema

17 Ekufikeni kwethu eJerusalema abazalwane basamukela ngokuthokoza. 18 Ngosuku olulandelayo uPhawuli lathi sonke sahamba ukuyabona uJakhobe, bonke abadala babekhona. 19 UPhawuli wababingelela wabika ngokugcweleyo konke uNkulunkulu ayekwenzile kwabeZizwe ngokusebenza kwakhe.

20 Bathi sebekuzwile lokhu bamdumisa uNkulunkulu. Yikho basebesithi kuPhawuli: “Uyabona mzalwane ukuthi izinkulungwane ezinengi zabaJuda sezikholiwe njalo bonke bangabatshisekela umlayo. 21 Sebetshelwe ukuthi wena ufundisa bonke abaJuda abahlala phakathi kwabeZizwe ukuthi bafulathele uMosi, ubatshela ukuthi bangasoki abantwababo lokuthi bangalandeli amasiko ethu. 22 Pho senzeni? Ngeqiniso bazakuzwa ukuthi usufikile,

23 ngakho yenza lokhu esikutshela khona. Kulamadoda amane phakathi kwethu asenze isifungo. 24 Hamba lawo amadoda la ubambisane lawo emkhutsheni wokuzihlambulula, ubabhadalele izindleko zabo zakhona ukuze bagunde amakhanda abo. Ngakho umuntu wonke uzakwazi ukuthi akulaqiniso kule imibiko ngawe, kodwa babone ukuthi wena ngokwakho uphila ngokulalela umlayo. 25 Abezizwe bona abakholwayo sesibalobele ngesinqumo sethu ukuthi kabaxwaye ukudla okunikelwe ezithombeni, bangadli ububende, lenyama yenyamazana ekhanyiweyo lokuphinga.”

26 Ngosuku olulandelayo uPhawuli wawathatha lawomadoda wayazihlambulula kanye lawo. Wasesiya ethempelini ukuyakwazisa ngosuku lokuphela kwezinsuku zokuhlambulula lokuthi umnikelo walowo lalowo wabo wawuzakwenziwa nini.

UPhawuli Uyabotshwa

27 Kwathi lezozinsuku eziyisikhombisa sezizaphela, abaJuda abathile abesifunda sase-Asiya babona uPhawuli ethempelini. Balidunga lonke ixuku bambamba uPhawuli 28 behlaba umkhosi besithi, “Madoda ako-Israyeli; sibambiseni! Yiyo le indoda efundisa abantu bonke ezindaweni zonke okuphambene labantu bakithi lomlayo wakithi kanye lendawo le. Ngaphandle kwalokho usengenise amaGiriki emagumeni ethempeli wangcolisa indawo le eNgcwele.” 29 (Mandulo babebone uThrofimu wase-Efesu edolobheni eloPhawuli base bekhumbula ukuthi uPhawuli wayeze laye emagumeni ethempeli.)

30 Idolobho lonke laphithizela, abantu beza begijima beqhamuka inxa zonke. Bamdumela uPhawuli bamhudula bemsusa ethempelini, amasango alo ahle avalwa. 31 Bathi besazama ukumbulala, umbiko wafika kumlawuli wamabutho amaRoma ukuthi idolobho lonke lase Jerusalema laseliyaluzela. 32 Khonokho nje wathatha abanye abaphathi kanye lamabutho wagijimela esiphithiphithini leso. Kwathi labo ababevusa uthuli bebona umlawuli lamabutho akhe bema ukutshaya uPhawuli.

33 Umlawuli weza wafika wambopha wathi kathekelezwe ngamaketane amabili. Wasembuza ukuthi wayengubani lokuthi wayoneni. 34 Abathile exukwini bamemeza lokhu, abanye bamemeza okunye, kwasekusithi ngoba umlawuli engalizwa iqiniso ngenxa yokuxokozela waselaya ukuthi uPhawuli kasiwe esikanisweni samabutho. 35 Esefikile ezinyathelweni zokuqansela endlini isiyaluyalu sabantu saminyezela satshisa waze wathwalwa ngamabutho. 36 Ixuku elalilandela laphikelela limemeza lisithi, “Msusele amanqe!”

UPhawuli Ukhuluma Lexuku Labantu

37 Amabutho esathi amngenisa ngaphakathi uPhawuli, wacela kumlawuli wathi, “Ngingake ngibe lelizwi lawe na?” Yena waphendula wathi, “Uyasikhuluma yini isiGiriki?

38 Kawusuye yini umGibhithe owavusa umvukela ukhokhela izinkulungwane ezine zamaphekulazikhuni enkangala ngesinye isikhathi esidlulileyo?”

39 UPhawuli waphendula wathi, “NgingumJuda waseThasu eKhilikhiya, isakhamuzi sedolobho eliqakathekileyo. Ngicela kengikhulume kulaba abantu.”

40 Esetholile imvumo kumlawuli uPhawuli wema ezinyathelweni wathulisa ixuku ngesandla. Kwathi bonke sebethule wakhuluma kubo ngesi-Hebheru wathi,